ياذا الخفـوق اللـي بجرحـه تعنيـت
محتاج انا ابعد عنـك لوهـو ثوانـي
اسرتني والنبـض فيـض التناهيـت
وجرحـك مكيـن ساكـن ٍ بالمحـانـي
نوب مع الحيين ونوب مـع الميـت
لاغبت عنك شـوي ضيمـك دعانـي
راحت سنين العمر من دون توقيت
شابت عيونـي وانـت ياقلـب عانـي
الـى متـى والــدم بعـروقـك يهـيـت
حتى الحبـر ماعـاد بـه مـن معانـي
ماجيت ابكتب شعر وادور الصيـت
ولاجيت ابشكي جور خـل ٍ جفانـي
جيت اترجّى قلبي اللي بـه اشقيـت
واقــول يكـفـي ماجـرالـي كـفـانـي
ماعـاد اشيـل الهـم ياقلبـي ازريـت
غيّر ولو مره عشاني ! عشانـي !!
وجرب تعايش لحظة ٍ دون تفويـت
لحظـه فـرح ومحاصرتهـا الامانـي
مد النظر لاضـاق صـدري وحنيـت
وخل الفضا لاكبـر همومـي مكانـي
وإن كان ماغنيـت لـي بالهنـا بيـت
بـتـاكــد انــــك ياقـلـيـبـي انــانـــي
عشقـت حزنـك واكتفيـت وتكافيـت
وبـدلـت نبضـاتـك بكـسـرة زمـانـي
الحاصل انـي منـك لارحـت لاجيـت
القلـب قلبـي ان بـغـى او عصـانـي
